الگصبه هامة هور

لوما طولها..يضيع الخضيري

  بجرح شبچه

الگصبه ناي ...

اوٌنته بعدال حسره..

اطول من الليل صوته...

يجرني بطراف الگصايب

طايرات وطولهن مردي..

وشگف حذاف خاتل

والگصيبه تغطي عين من الشمس...

دوروك ..

ونشدوا شطوط العشگ..

مامرها خٓيٌال ومهرته..

امرهدنه وخطواتها بروحي ربابه

وذيلها اليلتف عله ذراعي وتر

الناس كلها شگد تحبك..

حتى بغيابك فلا ينطون نشده

وانت وينك خلصت العده

وحدادك ثيل اخضر ...

مرني ذيج الليله طيفك..

خايفه المهره بظهرها الفارس النشمي جريح..

وسال دمك ...

لونه اخضر مدري احمر..

الف مره..

كتلك الدنيه حمل ..

جمدوب شايل موت فوگ اجتافك،

وچفنك  ورگ برديه اخضر..

حتى كافورك دفنته بطين حري..

دوروك ودوريتك..

كل فناجين السواحر شافتك ظل غيمه تسري..

ونايم ابصفها الگمر..

چن خيط احمر

لاهو دمك..لاهو بزغة فجر منك...

تيهتني وگمت المن رمل كل اثار جدمك..

حتى اصوغ مرايه طشت كل تصاويرك  مثل زيبگ وكلك ليلو اخضر

هسه ازهگ ..حيل ازهگ

وانفخ من الروح موگد لهب داوي..

يطشرك بنص المرايه

 ويمحي ترجية غواك

من تطك تطشر انت ومثل جامة

 يضيع بيه وبيك جمار المعاني..

وينكسر بيها الرمش شايل

سواد وجمر دمعه..

وانه اشوفك..

طيف جيتك منكسر واتشظه بخيالك رماد..