الدله اشكد كريمه لو حضر فنجان
والكهوة ابعطرها اتفوح
يتوزع شذاها والعطر ريحان
ومضايف أهلنه أبوابها مفتحات
ووجاغ الدلال على الجمر يرتاح
والهاون يناغي برنته الجيران
واشباب المضيف أمعاشرات الريح
تنادي الضيف وينك فوت للديوان
والديوان تلتم بيه وجوه الخير
عدهم روح طيبه والعرف ميزان
ولو صارت طلابه ما تبات الليل
كل شبه ابمضيف الخير
ترجف لو حصل عدوان
وكل كصبه ابمضيف الستر
تنضح طيبه واحسان
وشيوخ القبيلة اتحشم المعروف
وتطرد كل مشرشب صافح الشيطان
وهاي اطباع اهلنه وما عليهم زود
متمسكين بالطيبات ،والهم بالستر عنوان
ولو كعدت الوادم ..وانطرت زينات
تتسابك اعلوم الخير
والدلة عطرها ايفوح
ونسمع رنة الفنجان
وتتصافح اجفوف الزلم
وتوكف راية العباس
رايه للستر والخير
والمعروف والإحسان
**************
ونّه.. وطيور.. وجرح
خضير الزبيدي
طافت بروحي السوالف
ونه وطيور وجرح
ولنه روحي
بلا ذجركم
نجمه ضيعه الصبح
عفيه كلبي ما نسيت
شهور وسنين التعدت
ونته ذاك
انته الوكح
تذكر وجوه الاحبه
تذكر الكعده
واملنه المايصح
ذاك بطران ويغني
بهيده يلشعرك سرح
وذاك ملهوف ويدور
جمله ضاعت بالشرح
ياصديقي الدنيا غابه
ياصديقي الدنيا مسرح
بيه اليغني ابحزن
وبيه اليغني ابفرح