بأم السباع الصبح طش الورد روحه
نيسان غنه فرح واتشافن اجروحه
ميلاد برعم حلو
عالدنيه ينثر دفو
ابعزم الشباب انتصب للناس مرجوحه
٠٠٠٠٠٠٠٠ ٠٠٠٠٠٠٠٠٠ ٠٠٠٠٠٠٠٠٠
بأم السباع انتشر عطر الورد والهيل
الليل خضر صبح ما قبل يبقه ليل
نبعت غيرة فهد شد الشباب الحيل
احله اغاني العشك
آبشفة المحبه صدك
الفرح ينثر فرح ايد الوفي اتلوحه
٠٠٠٠٠٠٠٠٠٠ ٠٠٠٠٠٠٠٠ ٠٠٠٠٠٠٠٠٠
بأم السباع انولد اليوم ابنك فهد
ميلاد طش الفرح طرز ربوع البلد
شيلة بهيجه رمز شايلهه بيرغ حمد
ايغني صوته وطن
متباهي بيه الزمن
قمه اتحاد الطلبة يتباهن اسفوحه
٠٠٠٠٠٠٠٠٠٠٠٠٠ ٠٠٠٠٠٠٠٠٠ ٠٠٠٠٠٠٠٠٠
بأم السباع الخبر طيف او فرح نيسان
ب ١٤ منه اتولد على الخارطة عنوان
بسم اتحادي البطل يتومس الإنسان
وايغني احله الأغاني
اببغداد ساحة اماني
أم السباع اصبحت الكل طالب اطروحه

عرض مقالات: