/
/
/
/

تريد من المتظاهر السلميّ يكون متحضر وعلى ذوقك ومثل متريد..
وبنفس الوقت تريده يتحمل التهديد واحتمالات الخطف والقتل والاعتقالات التعسفية..
وبفس الوقت تريده يعبر عن احتجاجه بلياقة ويا ريت يستخدم الآداب والفنون..
وبنفس الوقت تريده يتحمل ضغط ابتعاده عن بيته وخوف أهله وتحذير زوجته أو أمه واشتياق أطفاله..
وبنفس الوقت تريده ينام بالساحة يوم برد ويوم مطر ويوم تهديد..
وبنفس الوقت تريده صاحي.. ويفرز الصفوف.. ويعرف المندسين.. ويندل المخربين.. ويحمي التظاهرة.. ويغطي أخبارها.. ويصورها وينشر عنها.. ويسوي حملة دفاع عن أفكارها.. ويعقد ندوات.. ويحل أزمات.. ويواجه كل محاولات شراء الذمم.. ويصمد كدام المغريات... ويبقى ورا هذا كله مسترخي ووردة ويتفلّس ع التمن..
وانت حضرتك كاعد تتفستق.. وبالچذب ما صارف ع الحكومة كلمة تنديد على دماء الشهداء اللي راحت.. ولا سألت الطبقة السياسية ليش هالتسويف والمماطلة؟ و ليش هاللعب والعناد ويه الشعب وما يعجبك حتى دعاء نصر للشباب تدعيلهم.. واذا كلش زحمت نفسك تسوي لك منشور بيه حجاية عامة "اللهم ارحم الشهداء" .. هاي إذا تعبت نفسك وحجيت..
وهاي عود إذا ما طلعت تشتم المتظاهرين وتخبط يابسهم على أخضرهم لأن تاج راسك يحكم حالياً ومتريد الحكم يروح منه.. أو لأنك خاسر شكم مليون بوحدة من اعمالك التجارية اللي أخرتها التظاهرات.. أو لأنك ضايج لأن اضطريت تلوف بالسيارة بحكم قطع الشارع عن الدوام الحكوميّ بساعات الدوام.. وانت بهذا كله أهم شي عندك هو انته.. ووظيفتك وجيبك وفلوسك وعائلتك.. والناس وفقرها وتضحياتها وعوائلها كلها إلى الجحيم.. إنت وحدك المهم والوطن مو مشكلة..
نكولها للمرة الألف: احنه ضد التخريب وضد أي اعتداء على الممتلكات العامة والخاصة.. وكلّ ثورة بيها أخطاء واختراق ومندسين ومخربين ومدفوعين أجر.. بس انته اخذ الصفة العامة إلها لأن من ٣ أشهر غالبية اللي سووه الشباب يدخل ضمن التصعيد السلمي وجربته كل الشعوب وتواجهوا وي الرصاص بصدور عارية... فإذا عندك نقد وافكار تفيد الثورة وتطورها سلمياً اكرمنا بيها بقلب محب وداعم.. ما عندك لا تصير حالك حال السلطة اللي متظاهرين احنه ضدها وتدور تسقيط وتشويه وتخوين وتحريض ع المتظاهرين. تره هواي منهم -وآني شاهد- واصلة بيهم الحالة للموت من أجل هذه الثورة وما ينطوها..
افتهمها عاد..
#نريد_وطن

تحميل التطبیق علی موبایل اندروید و اپل