الثقافة اتيتمت وانشكت الكاع
نجمك من هوى ياكامل شياع
نجمك من هوى ياكامل اوطاح
ارض خصبه الثقافه ابغير فلاح
هيمن عالثقافه الجان ردّاح
متوهمه الخرافه شايله اشراع
نجمك من هوى ياكامل شياع
مشروعك وعي محتاجته الناس
بعد ماصاح من الضيم الاحساس
دمّك للشهادة صار نبراس
القاتل بالاصل بالدين خدّاع
نجمك من هوى ياكامل شياع
حسافه اتموت برنود اليصكون
ماعدهم حلال اولا يحرمون
كاتم صوت وابكيف اليحكمون
يصكون البشر مايلحك اوداع
نجمك من هوى ياكامل شياع
اصيل اوشالتك عالناس غيره
عفت الخير والراحه الوفيره
اغترابك جان يم اوربا حيره
خايف عالوطن للجهل ينباع
نجمك من هوى ياكامل شياع
خايف عالوطن ينباع خرده
سحر تاريخنا محد يرده
ماي ابرمل بالغفله ايتبده
اوما نلكه وطن بالدنيه ينباع
نجمك من هوى ياكامل شياع
عمت عين الترس جسمك رصاصات
جاهل ماعرف مثوى العذابات
فقط للفاسد اينفذ قرارات
خبيث اوربه ابمنظومات الاوجاع
نجمك من هوى ياكامل شياع