عضويتك شرف / الشاعر حسين البهادلي
عضويتك شرف لن علمتنا إشروط
الخبز من ينجرح بالثوره يتضمد
وبيان الحزب علمنا الحزب هم بيت
إذا مـنفـعله راح الجـهـل يـتـسـيد
المقر من ينغلق ما ينغلق تنظيم
الكلب مفتوح إذا باب المقر ينسد
وتؤخذ ولا تعطى.. وگالها التاريخ
الشعب من يسكت الحريه تتفرهد
ولجـل حـريتك ومـن تـنـحـكم بإعـدام
مرجوحه الحـبل عالـرگبه مـن ينشد
إذن مـفـروض تـُدرس ثـورة الجـياع
ذلـه العـيشه مـن إتصير سـَد إبـسـَد
فهد لو ما يعرفك راح توفي وياه
صدّگ چان أبد ما ثار واستشهد
بس يعرفك اتطبق المبادئ راح
وجسر للشعب ولبطن الشمس تمتد
ويعرفك لو ثرت بركان.. إذا فوگاك
كل شـط العـرب يـنـدار مــا تــبـرد
رادو لزمه من ذاك الوكت لليوم
عليك ونبشو التاريخ أب وجد
وبدو من يم فهد.. جمـّعو ثمن اعقود
لرائد فهمي وصلو وانت قيس الحد
ومن ما لگو لزمه وأيسو فد نوب
گالو يا شعب هذا الحزب الحد
وأنت وياهم إمخلصها خد وعين
وهمه إمخلصيها وياك ناب وخد
المهم هسه أنت عمرك خمسه وثمانين
وشباب إبفكرك ويوميه تتجدد
اليگلك صدفه.. أبد مو صدفه اگلك ليش
الربــيـع أخــتار شـهـر آذار بــي ورّد
عرف بي اجت ناس القيمته يقدروه
لهذا امن الصحاري اليابسه اتجرد
بيــت الكل أديـب وعــامل وفــنان
ثـوره الكل فـقـيـر وأبـد مـا تـخـمـد
على گد إجتماع ومن اقل تنظيم
جـبتهم گـدرتهم شـفت مـالك گـد
وأگلب صفحه صفحه وتعرف المقصود
وغيرك يا حزب بالسجل ماكو أحد
إشتراكات الحزب من عدها تنطي أجار
ابوكت مولاتهم كل سنه اتصير أزيد
لهذا السبب وكت الصدگ.. يتخبلون
إذا سمـعـو ابأســم الحــزب يتردد
ومو بس هاي بس صيـّح ( شيوعيين )
بـــراس الرأسـمـاليه الضــغـط يصعد
مخرّج من كفاح الحزب چم ( نـَواب )
مخرّج من ( طريق الشعب ) چم مـِربـَد
الراد يگلي إحـچـي وشـاهـدك وياك
استحى من شاف هيچ أبطال بالمشهد
سلام وأبو العيس الحيدري وشمران
وكل هـاي الأسماء الألك صـارو سـَــّد
ابوجه ( قصر النهايه ) لـ ( نگرة السلمان)
الصــار العــدد مــنك بيها ما يـنــعــد
حتى الحـبل من الشــنق مــّــل وگـال
الشيوعيين أريد أعرف هذوله أشگد
بهذاك الوكت خل تسولف الأحداث
چانت بينا بس عين الشمس تنسد
فرق بين اليجـيك بمـنجـل وچـاكوچ
وبين اليجي بسيف وعالرگب ينحـّد
إبوجه أبيض أجيت أبيض وجه ظليت
وغيرك أجـه أبوجه أسـود وظل أسـود
ـــــــــــ
*القيت في احتفالية الحزب الشيوعي في واسط
عصر يوم 30 / 3 / 2019
*************
هلال الحزب / محمود العكيلي
هلال الحزب هل ابشهر آذار
واصبح عيد ثابت للشيوعيين
يتجدد علينه العيد كل عام
بميلاد الحزب نحتفل صار اسنين
وابكل بيت نعلكله صواني اشموع
يستاهل حزبنه فرجة الطيبين
ظل ابيض نقي ما اتلوثت يمناه
من يوم الولادة وحتى هذا الحين
من اجل الشعب قدم ضحايا اهواي
ابطريق الموت ظلوا دوم ماشين
صعدوا للمشانق مارهبهم خوف
ظلوا للظلم والطغيان متحدين
لاهمهم سجن.. لانفي.. لاموت
ومن كل صوب تولاهم سجاجين
الحزب رافع شعار اصلاح حال الناس
واهدافه صريحه الناس متساوين
ياحزب الشغيله الشعب مجروح
مالاكي اليضمده الناس متالمين
ردتك ياحزب اتحاسب المسؤول
ومايعبر عليك اسلوب محتالين
احزاب وكتل ماوفت الهالناس
بس انت تريد انصاف محرومين
منهم باع ذمته ابزرقه الدولار
ومنهم ظل عميل وماكسب عفرين
وانت ياحزبنه بين هذا وذاك
اتفكر بالشعب وابناسه مظلومين
الحزب يبقى شباب وقائد الاصلاح
ولاهمه العمر بالخمسه واثمانين
الف مبروك عيدك ياحزبنه البار
جماهير الشغيله ابعيدك امعيدين
**************
وين أعلك إشموعك وين / حميد الموسوي
لإجل شعبك بحرت إبحورهه
وضحيت .
ضميت الوطن بعيونك
إووفيت .
يبوگلب الچبیر وصوت های الناس
یلدربك كلف مشواره ...
وإتحديت .
لإجل ناسك .
المحبه ..والسعاده ..
وعافيه إتمنيت .
تمر ذكراك ..!
حملت إشموعي وإورودي .
إلك يا شامخ إتعنيت .
تحل ذكراك .!
وين إلگاك .؟
وين بيا كتر
حطيت .
إلمن أنشد ...؟
إليا بيت.
وأنته إگلوب شعبك ضمتك
موبيت .
وين أعلگ إشموعك وين ؟
نجم صعديت .
وبربوع الوطن ضويت .
وأجمل لافته لعراقنه خطيت .
طرزت الوطن
بإسمك .
خفافيش الظلام إتخاف من إسمك .
من طرواك ..!
من ذكراك ..!
من فكرك ..!
ومن ربعك .!!
خفافيش الظلام تخاف من حلمك ...!
لأن حلم الشعب حلمك ..
إجيتك شايل إورودك
وحرت وين أعلگ آشموعك .
وأنته بكل كترمن الوطن ضويت ..
وأنته وي النجم صعديت .
*************
كتب الشاعر الشعبي حمود حسين كعيد "ابو عادل" مغرداً لحزبه المجيد
تظل كلك ربيع بروض
تجس اليابس البلعود وترده لنياسينه
ويظل وجهك بدر يندار
تشرب من ضواه شموعنه وتضوي بليالينه
ثابت والليالي ادور
وعيونك سواد عيونه وضيهن يدلينه
كلب مشدود فوك كلوب
ومن عندك تظل ترضع سواجينه
**********
يا حزبنا العظيم / د. ظاهر شوكت
تلميذك المخلص يروي
قصة الوطن الجريح
تغير الجميع وبقيت انت المرتجى
وهاجر الكثير
وبقيت انت حارسا
تحنو على
براعم العشق على ضفافنا
تزرع في قلوبنا
أمل الخلاص
من الرجوع إلى الجاهلية
فأنا مشتاق اليك
شوق الزهور إلى الندى
شوق الصبايا الحالمات إلى الحنان
شوق الحمام (الراد لهله)
شوق النخيل إلى الفرات
شوقي إلى الإعلان عن هويتي
(عراقي هواي وميزة فينا الهوى خبل
يرب العشق فينا في المهود ثم تتبع الرسل
فأمي أرضعتني من فرات حليبها
أنّ الصلاة على ترابٍ لا يوحّد ليس تكتمل)
ماذا حدث
يا حبة القلب ويا نور العيون
قد طفح الكيل ومات الموت عند الضائعين
وبقيت انت شامخا
تعلو على المال المدنس
ونفتخر بك يا حبيبي
ويشهد الأعداء أنك ما زلت
ابيض العقل والقلب واليدين