(1) تجي الريح
إحزن بعد
إحزن بعد ، لكن ولا تنتكس
ظلّك بهي
وعالي
وجميل النفس
باجر تجي الريح
وتكنس ،
هالزباله كنس .
(2) نثر عامي
كلشي حزين بالعراق
كلشي حزين ،
الحب والفرح ، والحريه.
الروح .. والبيت وحمامة البيت ، النخل العصافير
الشمس ،
الشارع والشعر والنشوه
والخبز ، العدل ، الحق
الصداقه الوان الابواب
ضحكات الناس الغابت
مواعيد المحبين
العيد .. حنة الاعراس
شموع الكنايس ، الأذان
الماي الطيب اليغسل (المندي)
البياض ، اللون الاخضر
الرمادي اليرسم غيوم الترافه على الشبابيج ،
الذهب الخيل الاساور والخلاخيل
الاغاني والحنين
كلشي حزين
بس الغلط
بس الفساد
كلشي حزين بالعراق