ابيتنا الريفي العتيك
سدرة من تاريخ جدي
جنت أسميها (محنه)
وجانت إتسميني (أمل)
مدري ، مل!
المهم النيه بيضه ، ولاعلى المزحة زعل
جانت تسولفلي كلشي
عن أبوي ..
الباع كلشي
واشترى بحلمه وطن
عن أخوي ..
الكسر خشمه الحرس قومي
وما كفر بعصابة أمي
عن أمن عينه علينه
وين مارحنه وإجينه
عن سجل.. ابلايه ظل
شباط ذاك شباط الأسود
جرح ينزف
على طولك يا عراق
والقطار اسمه قطار
فتنه مليانه دواهي
وانته ساهي
الماي من حدرك جرى
وصار اللي صار
ومن هذاك اليوم لليوم انحصد
ما جناه شباط وإحنه إبلا رشد
آخ ..يا جرحي الغميك
آخ ..يا بيتي العتيك
سولفنلي
عن أمس
واليوم
ولباجر بعد
عن ضوه الفانوس وطلوك الرعد
بلجي هذا الجيل ما يخطي بعد
بلجي من يجفل
يفز طير السعد