/
/

بصرة
 
جذع شجره
ع العشب نايم
وحدره
لا على اطرافه
تشب
انجوم صفره
فطر
الجمال بروحه
ياخذ شكل 
زهره
الشجره
يمكن فزّزتها 
مدري اشبيها
چن ما مازحتني:
عيّرتني؟ :
روح احوي 
تمر بستان
من نخلة البصره !
 
مطالب
 
كالتلي بنت الهور :
محد يعرف الماي
بالفيض: يكتل
من يشح : يكتل
 
كالتلي بنت البصره
مقهوره :
لاماي عدنه
ويشح
والفيض كله
ملح
والكهربا
ما بعد
عدها خلگ
تنتل !
 
نفط
 
المعادله المكتوبه 
كلش سهله
كلش
والرموز
اوضح بعد
من ماي دجله :
البصره لوما هالنفط
چاصارت احلى !
 
الحبيبة
 
فتّشِت بين الورود
عن حبيبة
هاذي ورده
العطر
بيها يلامس الروح
واحسها
مو غريبه
وهاي ورده
صاحت بدربي
تعال اشتاگلك
لاتسمع الهم عني
غيبه
ورده
منزويه
بعيد
وبطرف بستان
اخضر
لابسه الاسود
گلبها
نجمه حمره
تشتعل
كل ليلة : بصره
صارحتها
اشگد عجيبه
شنهو ناسي ؟
طول نهر الروح
الچ ضفّه
خصيبه
وانا أدوّر بالورد
عن ورده
تشبه لچ: حبيبه ؟
 
الحسين
 
البصرة وحيدة 
المن تشتكي الوحده
الوحيدة ؟
ومنهو  يفزع للوحيده
وهي مسكونه
عطش
ومنهو يقره 
بطرف بستانها اليابس
الطيرة ؟
وهي تتحسر زمان: چان عندي
احلى من الرطبة
عش
وچان ياما عيني
مامسجونه
ماعدها
 ماعدها رمش
يحرسها من الطايفين
 البصرة 
من  معنى العطش
هي الحسين !
 
الماي
 
ماي البيت
بارد عذب 
صافي
ويشرح
المعجم
وبس اتذّكر 
البصرة
تجي وي الماي
كطرة سم !
 
الأفعى 
 
حيّه مَلْحه
من جنوب الفاو
تزحف
راح توصل 
حد مصبات الانهار
الرافدين
وغفله
شافتها الچلاب
ومحد اعليها
نِبح ْ
حيّه
من سم 
وملح !
 
اشارة
 
شاعر من البصره
ناشر بالجريده :
احلى كلمه: الماي
چانت عندي 
من اكتب قصيده !
 
السبيل
 
سبيل سبيل:
هاك اشرب ماي
واذكر
بالحزن
عطش الحسين
شلون 
شاغت روحه
ملهوفه
على گطره
وبعد حفنه اسنين
يتنادى سبيل: 
هاك اشرب ماي
واذكر
بالمآتم والاعراس
عطش
بنت الرافدين
البصره
واگلوب النخيل !
 
النهر الحزين
 
يترّحم بويب النهر
ع السيّاب
يشعل روحه
لويشعل شموع:
مو نهر
صرت آنه
غابه امن الدموع !
 

تحميل التطبیق علی موبایل اندروید و اپل